Abschnitt 2

Weret ok, dat Jenich Borgermestere, Radman, Borgher offte Jemand anders dessen vorscreuen vrede vnde louen breke, den Schall vnse Rad tor Wismere Richten An syn Hogeste, vnde qweme he wech edder entworde he en, so schall sick de Rad holden an zin gud, wat vnde wer dat were, vnde de helfte des gudes scholde vallen an de Herschopp vnde de andere Helfte an de Stad Wismere, vnde wer men ene In vnsen Landen vnde den Hense steden an kumpt, dar mach men ene Richten vor enen meeneeder. Vortmer Beden vnde willen wy, Dat de genante vnse Rad vnde Peter Langejohan desser vorscreuen Schicht vnde vnwillen Nicht meer scholen gedencken, men de gantz vnde deger nedderslan, Ok deshaluen nenerleie wrake don edder dencken, Vnde Peter Langejohan vorscreuen schal den Deneren vnser Stad vorscreuen, Namliken Scriueren, gerichtescriuer, wachtscriuer, anderen ridenden vnde ganden deneren, vnde desgelikes de Rad vorscreuen Peter Langejohanne, synen sones, ffrunden vnde medehelpers hir ane nichtes witen edder vorkeren, Men an beyden syden scholen erer eyn deme anderen gudlik, forderlick vnde ghunstich sin, geliik offte desse vnwille vnde vnvrede ny entstaen edder Irresen were. Ok schall nemand van en de ene teghen den anderen In qwader vorsathe wes forderen offte forderen laten mit worden offte werken, hemeliken edder opembar. Jenigen vplop to makende offte wat wyse dat yd scheen mochte, vnde schege hir wes van Jemande entegen, Dat willen wy mit vnseme Rade tor Wismere Richten an eer hogeste. Vortmeer. So also beth heer to etlike twiistige sake twiischen den vorgescreuen Borgermesteren vnde Radmannen vnser Stad Wismer an ene Vnde Mester Johan Langejohan, des vorgesechten Peters sone, an der anderen syden van der wegene, dat he in der genanten Borghermestere vnde Radmanne beheltnisse gewesen is, sint vpgestan vnde irresen, Don wy vorgenanten Schedesheren witlick kunt vnde opembare, Dat wy mit bywesende vnde Rade des werdigen Heren Theo derici van Caluen, gheistlikes Rechten Doctoris vnde der kerken to Lubeke Domprouestes, Na lude vnde Innoholde des bouenberorden Compromissi sodanner sake, dorch den genanten Peter Langejohan an vns vnde den genanten Heren Prouest van synes vorscreuon sones wegene gesettet vnde gentzliken gestalt, hebben fruntliken pronunctiert vnde vthgesproken, pronunctieren vnde vthspreken vormiddelst desseme vnseme vthsproke, Dat de vorgenante Peter Langejohan so vorfogen vnde schicken schall, Dat Mester Johan, zin sone vorscreuen, sodane sake ziner gefengknisse deger vnde all gentzliken affdo, bisette vnde dalesla, der nummer meer to denckende offte vp to theende In Jeniger wyse, so dat de Rad tor Wiszmere, de gemeenheid, Borghere offte Inwoners darsuluest deshaluen nynerleye wiisz to Jenigeme schaden offte vorfolginge komen. Dar to schal ok de vorgerorde Peter Langejohan schicken vnde also vorfogen, Dat sodaner sake haluen de Erwerdige In god vader vnde Here Here Johan, Bisschop, dat Capittele des Stichtes Razeborch vnde de Rad tor Wiszmer genszliken scholen blyuen ane alle vorfolginge, tosprake offte Tribulacien van wegene des vorscreuen Mester Johanne Vnde ok des Pewestliken Houes fiscal vnde aller Richtere offte erer Stedeholdere, geistlik offte werlik. Ok so scholen de vorgenanten Borgermestere vnde Radmanne tor Wismer den vorgesechten Mester Johan, so se erst vnde schyrst mögen ofte konen, Myt eneme offte mereren geistliken lenen besorgen vnde ene dar to presenteren, welkere lene In eren Jarliken Renthen scholen inbringen veftich Mark Lubesch mit aller bestellinge der Missen vnde anderer erer vplegginge, vnde alle de wile, dat se eme sodane geistlike lene nicht bestellen, so scholen se eme alle Jare na Paschen schiirst komende ouer eyn Jare vthrichten vnde betalen to syner genüge verlich Lubesche Mark beth so lange, dat he sodanne lene, so vorgerord isz, van en hofft entfangen. Vnde offt he to etliken lenen van deme Rade vorgescreuen gepresentert wurde vnde to dersuluen lene Rechte possessie offte besittinge qweme, Vnde de Renthe dersuluen lene sick vppe de Summe der Vertich Margk nicht streckeden, denne allike woll, wat vnde so vele iarliken van sulken lenen na vorscreuener wiise werd gefallen, dat schal afgeslagen werden van den Vertich Marken, de de Rad vorscreuen schall vthgeuen, Vnde wen Mester Johan vorgenant also vele In geistliken lenen van deme Rade vorgenant Nach bouenscreuen wiise hefft erworuen, dan so scholon de Borghermestere vnde Radmanne vorbenomet der vertich Margk Jarliken vthtogeuende gentzliken vnde all sin vordregen Vnde vortmeer darumme vngemanet blyuen. Hir mede scholen beyde parthie vorscreuen to vrede vnde enicheid sin gesettet by Penen vnde boten In deme vorbenomeden Compromisse begrepen. Vnde wy Schedesheren vorscreuen alle beholden vns de macht desse beyden vnse vthsproke, beiden vnde allen Parthen vorgescreuen vormyddelst vns gedan, Nach lude beyder Compromisse de to dudende, to Interpreterende, wo vakene vnde wanner des behoff vnde van noden sinde werd. Vnde dat sulk fruntlick vthsproke in aller mathe vnde wiise, so bouenscreuen steit, isz bescheen, Des hebben wy to merer sekerheid vnde vorwaringe vnser Stede Ingesegele witliken gehenget an dessen breff, Gheuen Na der bord Cristi vnses Heren Dusend veerhundert Jare Dar na In deme Souen vnde sostige(ste)n, Amme Vridaghe neghest na Sunte Johannis Baptisten daghe syner gebord.

Nach dem Originale auf Pergament in langem Querfolio im Wismarschen Archive, buchstabengetreu. Die Siegel von Lübek und Hamburg sind ausgerissen. Das große Siegel von Rostock von ungeläutertem Wachs hängt an einem Pergamentbande.

Im Großherzogl. Archive zu Schwerin befindet sich eine Abschrift, welche den Eingang dieser Urkunde nicht hat und beginnt: In godes namen. Amen. Ahen vnde iszliken u. s. w. Ebenso reicht sie bis zum Schlusse: Vnde dat sulk fruntlick vthsproke in aller mathe u. s. w., welcher fehlt und für den sie folgenden Ausgang hat:

Desse vnse fruntlike uthsprake bauenscreuen sint gedaen, gelesen
vnd ghescheen vormyddelst vns hertogen Hinricke vorgenant mit
sampt der erscreuenen radessendebaden der stede Lubeck,
Hamborgh vnd Rostock bouenscreuen alse in desser sake
schedesheren vnde richtere, den de ersamen beiden parte vorbenomet
hebben angenamet, beleuet vnd approberet wol to holdende, so see
des handuestinge vor eneme notario hebben an beiden siden gedaen,
vppe deme radhuse tor Wiszmer obgenant na der bort Cristi vnses
heren verteigen hundert vnd amme souen vnd sostigesten jare amme
Frigdage na sunte .lohans baptisten dage to myddensamere in der
stunde, alse men de none singhet. Vnd wii hertoge Hinrick vorgenant
hebben desses to orkund vnd merer vastheit vnd warheit vnse
groteste ingesegel henghen heten an desse vnse uthsprake vnd breff.