Abschnitt 1

Wy Borgermestere vnde Radmanne der Stede Lubeke. Hamborg vnde Rostock Bekennen vnde betughen Opembare In vnde mit desseme breue Vore alle den ghennen, den desse vnnse breff getoged vnde vorbracht werd. So also de Irluchtige Hochgeborenn furste vnde Here Here Hinrik, Hertoghe to Mekelnborgh, furste to Wenden, Greue to Zwerin, Der lande Rostock vnde Stargarde Here etc., Vnde wii der twiistigen sake twisschen deme Ersamenn Rade tor Wiszmere vppe de enen Vnde Peter LangeJohanne vppe de anderen ziiden willekorde Schedesrichtere sint In fruntschoppen offte Rechte na Inneholde der Compromisse, van beyden delen vorscreuen darvpp bewillet, angenamed vnde vorsegeld, Dat desulue Here Hertoge Hinrik vnde vnse Radessendeboden, van vns dar to gevoged vnde gesand, beyden vorscreuen parthien In macht der erbenomede compromisse bynnen der Stad Wismer vppe datum desses breues enen fruntliken vthsproke hebben vthgesproken vnde afgesecht, so nabescreuen steit. In godes namen. Amen. Allen vnde iszliken, de desse opene schrifft Sehen, Horen, Lesen Offte sust anderleie wiisz desses jegenwardigen breues Irkentnisse werden hebbene, sy witlik, kunt vnde Opembare. Nach deme in allen legeringen mynschelikes rechtuerdiges willen, so dat in dageliker ouinge waraftichlik vor oghen irschinet, neen dingh so legerlick, so anname offte so nutbar, heilsam, beqweme vnde so van noden isz, also vrede vnses vorlosers Cristi Jhesu dorch de engelschen gheiste den mynschen gudeswillen vorkundiget, vnde ok dorch sick suluest In deme afgange van desser werlde vpstigende to syneme vader, der sammelinge syner hilgen Apostele vnde eren nafolghers vns allen to troste vnde salicheid gelaten, Vnde nu doch In desseme dale der bedrofnisse Besunderliken in vorledenen tyden so denne vrede vormyddelst argeliist des vredevigendes twiischen den Ersamenn Borgermesteren vnde Radmannen der Stad Wiszmer An ene Vnde Peter Langejohanne An de anderen ziiden merckliken is to broken vnde vorstoret, Dat Wii Hinrik, van godes gnaden Hertoge to Mekelnborch, furste to Wenden, vnde Greue to Zwerin, Der Lande Rostock vnde Stargarde Here etc., In krafft vnde medewerkinge des geuers des vredes dorch biwesend vnses leuen Sones Hertogen Magnus Vnde ok vnses truwen Rades Des Erwerdigen In gode Vaders vnde Heren Werners, Bisschoppes to Zwerin, Des gestrengen Her Johan Veereggen, Ritters, Der Duchtigen Jachim van Pentze, Eggerd van Qwitzowe, Hinrik van Bulouw, Syuerd van Ortzen Vnde Bernd van Plesse, knapen, Her Arnd Mese, Cantzeler des Heren Bisschoppes to Zwerin vorbenomet. Her Hermen Widenbrugge, to vnser leuen vrouwen, Her Hinrik Bentzin, to Sunte Jacobe bynnen vnser Stad Rostock kercheren, vnde Thomas Roden, Secretarii, Vnde mede beweringhe vnde to daet der Ersamen Hinrikes Kastorpp, Hinrikes van Stiten, Borgermesteren, Des Werdigen Mester Johan Oesthusen, In beiden Rechten Doctoris vnde Sindici, Hinrikes van Hacheden, Radmannes, vnde Johannes Arndes, Secretarii, des Rades to Lubeke, Hinrikes Murmestere, Borgermesters, Godeken Toden, Radmans, des Rades to Hamborch, Gosschalkes Buk, Borgermesters, Radeleues Toyt, Radmans, vnde Johannes Pickardi, Prothonotarii, vnser Stad Rozstock Sendeboden, Also schedesherenn, myt wolbedachteme mode vnde rnpeme Rade In macht sodannes Compromissi dorch de Borgermestere vnde Radmanne vnser Stad Wiszmer vnde Peter Langejohanne bevulbordet, beleuet vnde vorsegelt allen vnde iszliken vnfrede, myshegelicheid, twidracht vnde vnwille aller vnde Iszliker sake twiisschen den ergerorden Parthen wesende gantz bigelecht, daleslaghen vnde gevlegen hebben In forme vnde wyse nagescreuen. Interste, dat de Borgermestere vnde Radmanne tor Wiszmere Scholen deger vnde gantz afdon alle voruestinghe vnde ordele, de ze wedder vnde ouer Peter Langejohanne, Borgermestere darsulues, gedan vnde gesproken hebben, vnde sodane voruestinge vnde ordele, wor ze de hebben laten scriuen, deger vnde gantz scholen lathen vthdelgen. Vnde Isset sake, dat Peter Langejohan, syne zones vnde frunde deme Rade tor Wiszmere In sodannen saken etlike eede vnde loffte gedan offte borgen gesatt hebben, dar dorch desse fruntlike schedinghe mochte gehindert werden, der schall de genante Rad en vordregen vnde scholen gentzliken machtlosz wesen nu vnde to ewigen tiiden. Item. de vorscreuen Borgermestere vnde Radmanne tor Wiszmere scholen den vorgenanten Peter Langejohan wedderumme to sick In den Borgermesters vnde Radesstoel laten komen, vnde en de tiid synes leuendes In aller mathe mit allen eren vnde redelicheiden, so he vormaels gewesen is, vor den oldesten Borghermestere der Stad Wiszmer holden, dar ane nicht hinderen schal de ordinancie des vorwordes to holdende nyeliken dorch den Rad tor Wiszmere Ingesatt, Beschedeliken, dat eyn Jewelik Borghermester darsulues eyn halff Jare In allen saken des Rades dat vorword schal holden, sunder dat sulke ordinancie, so ze gemaket Is, bestendich blyue, By also, dat Peter Langejohan to desseme negest komenden Sunte Michaelis dage vnde darna negest ouer eyn halff Jare vnde so vertan eneme Jeweliken Borgermestere nach syneme oldere dat vorword geborlik sy to holdende. Item. dat Peter Langejohan schal sick by den Dorchluchtigesten Hochgeboren fursten vnde Heren Heren Cristierne, Der Riike Denemarken, Sweden vnde Norwegen etc. koninghe, nach alle syner vormogelicheid vnde mit alleme vlyte bearbeiten vnde, Isset van noden, sick sulues personlik by syne gnade voghen vmme alle veyde vnde vnwillen, de zine gnade wedder vnde Jegen de Stad tor Wiszmere vmme zinen willen gedan hofft, gentzliken aftodonde vnde bitoleggende, so dat de van der Wismere deshaluen vortmeer to nyneme schaden komen. Item. wat In sodannen twiistigen saken twiisschen den ergesechten Parthien schaden, kost, vnde theringe is gedan vnde gemaket, beholden wy vns vth to sprekende vnde In nakomenden tiiden fruntliken to irkennende. Hir mede scholen alle vnde islike desser vorscreuen parthien klage, to sprake, forderinghe, Insprake, wedderrede vnde excepcien, ok desgeliken alle twidracht, vnwille, Anxst, vare vnde vnloue, de twiisschen densuluen parthen vnde eren frunden beth an dessen dagh gewesen zint, gentzliken, degher vnde all vorsonet, gescheden, to ende gesleten vnde so hen gelecht wesen, dat nemand den anderen, samptliken offte besunderen, Dorch sick suluest offte andere personen, Hemelick offte opembare forder darumme haten, ergeren edder hinderen scholen by Penen vnde böte In deme vorberorden Compromisse begrepen. Vnde vppe dat alle vorscreuen stucke samptliken vnde besunderen In truwen vnde gudeme gelouen vnde vnuorbroken geholden werden vnde nemand sick bevaren dorue, Beden vnde willen wy Hertoge Hinrik vorbenomed, Dat vnse Rad tor Wiszmer den Borgeren vnde meenheid darsuluest seggen schall by den eeden, de ze vns vnde desser Stad gedan hebben, dat se vmme desser schelinghe vnde twidracht willen In tokomenden tiiden nynerleie wrake don offte vnnutte seggend hebben scholen.