Anhang

Beilage zu Nr. 327. 1494 Februar 6.


Unsere vruntliken gruthe mytgudwilligher alles guden na vormoghen irbedinge stedes bevoren ersame namhaftighe wolwyse heren unnde besunderge ghunstige gude frunde. Wy foghen juwen wysheyden ghutliken to weten, tho unsen kentnissen uth des werdyghen unnde achtbaren heren meyster Herman Melberges unser universiteten gheleveden unde laves werdighen ledemathen ghekomen to synde, wodane wiß de sulve meyster Herman, also he denne etlike jare unde tydt bether tho deme gemeynen gude juwer loveliken stadt denende juwe overste schole na synem vormoghen hebbe regerdt, durch juwen ersamenheyt myt woldedicheyden, ghunsten unde guder willen bewisinge lefflikenn sy erfolghet, des wy denne juwen ersamenheydt allen intgemeyne unnde enen jewelken inbesunderheyt beneven unde bedancken, juwe ersamheydt unnde de juwen yn allen gude wedder na geborlicheyt to erkennen etc. Na deme over de sulve meyster Hermen umme syne st . . . at unde gr . . . th to vormerende unnde vorhogende by unns syck wedder tovoghende ys ghesynneth, unns byddende unnde ßer begherende, wy ene mit eneme mogheleken stande syner personen themelekenn mochten vortoseende, so wy denne hebben anßeende unde to herten nemende dessulven duchticheyte doghendte unde erbarheydte, de wy in em als he by unß gewesen ys vormyddelst vorfarenheydte gentzliken befunden hebben, willende em der na bildelicheyt genethen lathen, ene myt eynem bequemen stande nomeliken myt eyneme huse in unser universiteten, dat sulve myt samendt den studenten dar ynne jeghenwardich wesenden unde tokumftigen uppen negest tokamenden samer durch ene to regerende unde vor to wesende, beleveth, gentzlikenn hopende unde vaste getruwende, sodaneth nicht entegen syn werde juwen erliken wisheyden de wy in guder andacht flitigen unde fruntliken bydden, juwe ersamheydt, deme vorschreven meyster Hermen vortan wo bevoren unde beth . . . r to gesch . . . n ghunst, vorderynge, guden willen, moghelike unde notroftyghe bystendicheyt in synen ernstaftigen gescheften na juwer herlicheyde gewanlike woldedicheyde ock unser vorbede halven willen ertoghen, alß wy des unde alles guden juwen ersamenheydt wol betruwen. Unde weredt nu ofte hir nam . . . ls eynen geleerden man to juwer stadt beh . . . ff van unns begheren wurden, wullen wy in sodanen juwer stadt unde dersulven gemeynen besten to gude guthwillich gesporeth werden, unde wor wy furder juwen erbarheyden unde den juwen to willen unde wolgevalle syn mogen, dar to syn wy gentzliken geneghet. Gade salichlyken bemalen. Gegheven to Rostke ame daghe Dorothie der billigen juncfrouwen anno etc. XCIIII under unser universiteten sigil.


Rector doctores magistri des rades
der universiteten tho Rostke.

Rückseitige Aufschrift: Den wysen unnde erbaren herenn borghermeysteren unnde r . . . dtmannen der stadt Gdantzk unsenn besunderghen andechtighen heren unnde frunden fruntliken gescrevenn.

Ausfertigung, Papier, Kal. Staatsarchiv Danzig 300 Urk. Schiebl. 32 B 49. Unter Papierdecke das briefschließende spitzovale Universitätssiegel in rotem Wachs.

Dieses Kapitel ist Teil des Buches Mecklenburger in Danzig