Herzog Heinrich versichert Bürgermeister und Rathmannen zu Wismar seinen und seiner Söhne Beistand gegen Peter Langejohann Wismar, 1464, April 13.

Wii Hinrik, van godes gnaden Hertoghe to Mekelenborch, Furste to Wenden, Greue to Zwerin, der Lande Stargarde vnde Rostzke here, bekennen opembare befugende vor vns, vnse Sones Hertogen Alberte, Johanne, Magnusse vnde Baltasare vnde vor alszweme, Woll dat wii in vorledenen tiden Peter Langejohanne, hiir vormaels Borgermestere vnser Stad Wismer, in synen rechtuerdigen zaken, efft he welke hadde, nicht afftholiggende jegen de vnsen van der Wismer gelouet vnde etlike vorsekeringe gedan hadden, also hebben vns nv woll zodder den tiden de Ersamen vnde Wiisen vnse leuen getruwen Borgermestere vnde Radmanne der obgenanten vnser Stad Wismer opembaret vnde to irkennende geuen, wo de sulue Peter Langejohan etlike zware mysdade gedan hebbe, Dar vmme he vort vth der suluen vnser Stad sii geweken vnde sy vort vmme zodane zine mysdade na vnser Stad rechte vnde gesette nach wonliken achten vnde rechtdagen vor Gerichte geeschet vnde sy doch nicht vorgekomen, also recht is, men in sodanen synen mysdaden na Lubeschen rechte vnuorantwordet gebleuen, vnde sy vort na Lubeschem vnde vnser Stad wonlikeme rechte voruolget, vnde na rechtes vthsproke vredelos gelecht vnde voruestet etc. Dar vth wii denne dessuluen Peters vorbringinge vnvast vnde vnwarafftich hebben irkent to wesende. Also hebben ze vns vorder odmodigen angefallen vnde gebeden, wii en in sodanen eren zaken ere recht, dar ze van vnsen zelgen vorelderen vnde vns mede bewedemet vnde priuilegieret zint, to beschermende vnde se mechtich to beholdende, Ok mede to betrachtende, efft de sulue Peter Langejohan myt welker wyse zik weder in vnse Stad drengen wolde, dar grot vorderff vnde vornichtinge vnser Stad Borgere vnde Inwonere van entstan vnde komen mochte, van zulker weldiger indrenginge wegene bystendich wesen willen, vnde en alsodaner weldigher indrenginge vnde inkomynge wedertostande myt werken vnde scriifften behulpen vnde gudwillich wesen willen etc. Hebben wy myt vnsen Rederen dyt alle woll ouerwegen vnde vns des rypes rades gebruket vnde entliken vortastet, bespraken vnde beslaten, Also dat wy nach sodaner vnderwiisinghe vnde naturlikeme rechte de vnsen nicht mogen effte en willen vorlaten, men wy myt vnsen sones vorbenomet allewege en in dessen eren rechtuerdigen saken, so furstlick vnde naturlik ys, bistendich vnde behulpen zyn vnde en ere recht, rechticheide, priuilegia, Stad willekore vnde wonheide beschermen vnde in macht beholden willen helpen, vnde en steit vns nicht to donde Peter Langejohanne vorbenomet in sodanen saken bytoliggende, men wy myd vnsen sones vorbenomet moten vnde willen den vnsen vorbenomet in dessen eren saken bystendich zin vnde nicht Peter Langejohanne vorbenomet to zulker weldiger indrenginge vnde inkomynge staden, men en dat helpen keren vnde weren na all vnseme vormoge. Vnde wert, dat se van dessuluen Peters Langejohans wegene van Fursten, Heren edder Steden to dagen gedrungen edder esschet worden, so willen wii suluen edder vnse sones myt en to legelker stede to deme dage ryden edder vnse Redere dar to schicken vnde ouer ereme rechte vnde degedingen stan edder vor ze schryuen, wenner ze dat van vns esschen, wo en dat best vnde beqwemest dunkel wiesen, vnde ze vnde ere nakomelinge in dessen vorschreuen stukken vnde zaken nenerleye wiis vorlaten edder ouergheuen. Alle desse vorbenomeden stukke vnde artikele desses breues vnde en islik by sick louen wii Hinrik, Hertoghe vorbenomet, vor vns, vor vnse sones, Hertogen Alberte, Johanne, Magnusse vnde Balthasare vorbenomet, vnde vor alszweme den Ersamen vnsen leuen getruwen Borgermesteren vnde Radmannen vnser Stad Wismer vorbenomet vnde eren nakomelingen an guden truwen stede vnde vaste to holdene sunder irhande geuerde edder argelist. In groter tuchnisse aller vorscreuen dinge hebben wii Hinrik, Hertoge vorbenomet, vnse Ingesegel mit gantzer wisschop hengen heten an dessen breff. Ok hebben hiirmede an vnde ouer wesen de Erbaren vnde duchtigen vnse leuen getruwen Radgheuere Bertold Berthe, knape, wonachtich to Rambowe, Her Hinrik Bentzin vnde Thomas Rode. Gegeuen vnde schreuen tor Wismer na der bord vnses heren Jhesu Cristi Dusent veerhundert dar na in deme veer vnde sestigesten Jare amme Frygdage negest na deme Sondage, also men in der hilligen korken singet Quasimodogeniti.

Nach dem Originale auf Pergament im Wismarschen Archive. An einem Pergamentenen Bande hängt das (schlecht ausgedrückte) Siegel des Herzogs mit einem Helme über dem Meklenburgischen, Rostocker und Schwerinschen Schilde und mit zwei Schildhaltern.